THE BALM COSMETICS ||| منتجات مختاره من ماركة ذا بالم

بسم الله الرحمن الرحيم 

كيفكم يا صبايا يا جميلات :)

أولا كل عام وأنتو بخير و رمضان كريم 

آآآآآآآآه .. و أخيرااااا رجعت لمدونتي :"( 

باركولي و أخيرا بعد معاناه ٦ سنوات أتخرجت من الماجستير بتقدير إمتياز مع مرتبة الشرف الأولى :))

و استقبل الهدايا لوووووووووووول

راجعه المدونه ان شاءالله متحمسه و بقوه 

و حبيت انزل تدوينه من زمااان احلم إني انزلها عن منتجات ذا بالم الجميله 

مستعدييييين ؟؟؟!

أول شي شركة ذا بالم تعتبر من الشركات الهاي اند عندهم منتجات متكامله من مستحضرات التجميل و منتجات عنايه بالبشره وعنايه بالشعر و الأظافر ، تأسست شركة ذا بالم عام ٢٠٠٤ و خلال عشر سنوات اصبح لها صيت عالي و اصبحت من اشهر ماركات الميك اب العالميه ، تشتهر شركة ذا بالم بطريقة تعليبهم الكيوت و الجميله التي لها طابع خاص يذكرنا بأفلام مارلين مونرو. من مميزات منتجات ذا بالم انها متعددة الاستخدام. 

من أشهر منتجاتهم طبعا اضاءات (مانايزرز) ماري لو ، بيتي لو و سيندي لو 

اضاءات بودريه بملمس مخملي تستخدم كنهايه للميك اب تعطي نضاره و اشراقه للمكياج 

 اضاءة ماري لو لؤلؤيه اللون بلمسه ذهبيه 

جميله جدا و انا عن نفسي ما استغنى عنها ابدا استخدمها على عظمة الحاجب و عظمة الخدود و مقدمة الأنف

ومدمع العين. 

  إضاءة بيتي لو برونزيه تستخدم كبرونزر 

كمان من الاضاءات اللي مااستغنى عنها بالذات لو حابه لوك برونزي تعطي مظهر طبيعي مع اشراقه جميله جدا. ممكن نستخدمها آي شادو كمان.

 إضاءة سيندي لو مشمشية اللون
جميله جدا لكن احس انها مناسبه اكثر للبشرات البيضا والاندرتونز البارد
فأنا عن نفسي مااحسها ناسبتني لأني حنطيه
 عيب الاضاءات الثلاثه انها سهلة الكسر :(
بالذات لو كنتي من النوع اللي تحبي تشيلي ميك اب في شنطتك
فنصيحتي لكم : جيبي قطنه دائريه اللي نمسح بيها الميك اب و حطيها جوا الاضاءه و اقفلي عليها
عشان تحميها من الكسر.

من الأشياء الجميله كمان من ماركة ذا بالم البلشرات بلشراتهم جدا جميله و ثابته لفترات طويله
في منها المات المطفي و في الشيمر اللي بلمعه خفيفه

البلشرات المطفيه مجموعة انستاين
عباره عن سته بلشرات مره حلوه و الوانها متنوعه وثابته ثابته مررره.

كمان من البلشرات الجميله مجموعة (بويز) ثلاثه درجات جميله (من اليمين) :
كابانا بوي : اللون البرقوقي مع حبيبات خفيفه تعطي لمعه حلوه مره
فرات بوي : اللون المشمشي المطفي
داون بوي : اللون الزهري المطفي.
تستخدم كمان اي شادو.

كابانا بوي يعتبر من مفضلاتي استخدمو اكثر شي في السهرات و اللوكات الثقيله.

مجموعة ماما كمان من المجموعات المشهوره من ذا بالم مكونه من (من اليسار) :
سكسي ماما: بودره شفافه تثبت الفاونديشن كمان تمتص الدهون
باهاما ماما : يستخدم ككونتور و برونزر بس انصح باستخدامه كونتور افضل لأن التون جاي على رمادي.
هوت ماما : بلشر خوخي شيمري بإضاءه ذهبيه.

 نجي لباليتات شركة ذا بالم .. طبعا عندهم باليتات كتييييير بس اشهرهم و اللي أنا استخدمتهم

باليت ميت مات نيود المتميز بألوانه المطفيه الترابيه اعشق الباليت دا لأنو يغنيني عن الحوسه لوووول يجمع كل الألوان اللي احبها واستخدمها كتير غير أن ألوانو قويه و سهلة الدمج ينفع لأستخدامه سواء في النهار أو السهرات و ممكن اضافة الوان شيمريه من باليتات تانيه عشان يكون اللوك ثقيل و مناسب للسهرات و طبعا نزل الاصدار الجديد ميت مات ترايموني ألوانو ربيعيه ومايله للزهريات و الموفيات اكتر مرررره نفسي فيه :(
 . و من الباليتتات اللي أحب كمان استخدمها باليت نيود تيود ونيود دود  متميزه بألوانها القويه الترابيه المطفيه و الشيمريه.

آيلاينر شوينق كمان من مفضلاتي ريشتو حلوه وسهلة الإستخدام حتى للمبتدئات و الحلو فيه كمان سواده فظيييع و مطفي وينشف بسرعه العيبين الوحيده اللي فيه انه يسيح عن مدمع العين

إذا دمعت عيني و كميته تعتبر قليله و يخلص بسرعه :(

نجي للأرواج شركة ذا بالم منزلين ٣ أنواع من الأرواج
قلوسات بس ماجربتها
أرواج كريميه
و أرواج سائله نهايتها مطفيه

الأرواج الكريميه (قيرلز)  سته درجات قوامها كريمي بس ثباتها حلو يعني ساعتين لثلاثه ساعات 
الدرجات من الأمام للخلف : 
Mai Billsbepaid
Anita BoyToy
Ima Goodkisser
Mia Moore
Foxxy Pout  
Amanda Kissmylips

نجي للحب الحب ،، أرواج ( ميت مات هيوز ) السائله بنهايه مطفيه يابنات الارواج دي حبيتها حب لدرجة إني تركت كل الأرواج اللي عندي وصرت استخدم دي الأرواج .. اولا ثابته ثبات عالي جدا ثانيا خفيفه على الشفايف ثالثا ماتسبب تشقق للشفايف بس طبعا لازم ترطبي شفايفك قبلها بس للأمانه الأرواج دي فظيعه فظيعه جدا .. في البدايه نزلوا ٨ درجات و كلها روعه و بعدين نزلوا كمان ٤ درجات بس لسه ماجربتها 
الدرجات من اليمين لليسار:

Devoted
Loyal
Adoring
Charming
Committed
Honest
Chivalrous
Sentimental

       اخر حاجه حابه اتكلم عنها هيا الميني باليتز ، شركة ذا بالم منزلين باليتات بحجم صغير حبيت الفكره  لأنها مناسبه للشنط الباليت اللي جربتو باليت (كاليفورنيا)  يحتوي على لون مات و لون شيمري و بلشر و اضاءه  فممكن لو عندك سفريه سريعه الباليت دا يغنيكي عن أشياء كتير. 

 كان دا الريفيو عن بعض منتجات ذا بالم اللي أنا جربتها و أستخدمتها و للأمانه كل المنتجات اللي استخدمتها حبيتها و فعلا منتجات ذا بالم سعرها فيها 
طبعا منتجات ذا بالم كانت غير متوفره في السعوديه ،، يا نطلبها اون لاين أو بعض التاجرات اللي ماسكين وكالتها 
زيي  لوووووول 
 وحتلاقوا بعض المنتجات متوفره في متجري  Shazishop
و الآن اصبحت متوفره في دبنهامز و فافافوم بس بدون الصور الكيوت اللي على العلب :( 

أتمنى يحوز الريفيو على اعجابكم 
و أشوفكم في ريفيوهات تانيه قريب إن شاء الله 


 

3 comments Make Up, Random