Tarte Cosmetics ||| منتجات مختاره من تارت

السلام عليكم و رحمة الله و بركاته 

سامحوني يا بنات متأخره في اضافة تدوينات جديده ، بس والله انشغلت مره و عندي مشروع تخرجي من الماجستير وحوسه ادعولي اتخرج ان شاء الله دا الترم واخلص .

حاتكلم اليوم عن بعض منتجات تارت اللي جربتها وادمنتها وتعتبر من مفضلاتي اليوميه.

 أول حاجه حابه اتكلم شويا و بشكل سريع عن شركة تارت 

 في سنة ١٩٩٩ ميلادي كانت سيده تدعى  Maureen Killy  مدمنة مكياج و لكن كانت مستاءه من ان اغلب الماركات لا تستخدم موادا طبيعيه في صناعة المكياج و معروف المواد الكيميائيه مضره بالبشره .

فحبت انو يكون لها خط جديد وخاص بها في عالم المكياج و بدأت مشروعها بانتاج مكياج من مواد طبيعيه وعضويه خاليه تماما من المواد الكيميائيه . منتجات تارت مصنوعه من زيوت طبيعيه و طين الامازون وخاليه من البارابين و السلفيت وغيرها من المواد الكيميائيه الضاره بالبشره . و الآن اصبحت شركة تارت من الشركات الهاي اند الكبيره المنافسه لشركات معروفه. 

 Amazonian clay waterproof brow mousse 

موس الحواجب بطين الامازون وضد الماء

موس الحواجب يعتبر بالنسبالي من الضروريات اليوميه قوامو غريب زي الجل بس اول ماتحطيه على حواجبك يصير باودري ويبين طبيعي جدا ، يجي معاه فرشه بنهايتين نهايه لرسم الحاجب ونهايه لتمشيط الحاجب الفرشه مرره فظيعه.

يجي اكثر من درجه : بني غامق / بني متوسط / اشقر رمادي / رمادي / اشقر 

سعرو اونلاين مع الفرشه ٢٩ دولار بدون شحن يعني تقريبا ١٠٩ ريال 

Lights, Camera, Lashes precision longwear liquid eyeliner

ايلاينر (كحل سائل ) لايتز كاميرا لاشز 

الايلاينر جميل سوادو فاحم نهايتو مطفيه ،  الفرشه جدا مستدقه تسهل على اي مبتدئه رسم خط الايلاينر بدقه و احكام 

مشكلتو الوحيده انو الكميه صغيره و بسرعه يخلص :( 

بس حقيقي انصح اي مبتدئه انها تستخدمو 

سعرو اونلاين ٢٠ دولار بدون شحن ٧٥ ريال تقريبا 

Lights, Camera, Lashes 4 in 1 Mascara

ماسكارا لايتز كاميرا لاشز  ٤ في ١

نجي للحب الحب الشوق الشوق لوووووول

انا حأشعر في الماسكارا دي اعشقها عشق ماينوصف حقيقي ماحبيت ماسكرا قدها 

لونها اسسسسود فاحم وقوامها تقيل يعني تكثف الرموش من اول كوت 

فرشتها مطوله و تثني الرموش غير انها تحتوي على فيتامين E  وزيت الزيتون يعني تحافظ على رموشك وماتضرها ابدا 

اللي ماجربت الماسكرا دي تجربها وحتدمنها صدقوني 

سعرها اونلاين ٢١ دولار بدون شحن يعني تقريبا ٧٩ ريال 

Best in faux lash extending fibers 

ماسكارا الالياف 

معروف عن ماسكارا الالياف انها تعطي كثافه وتغني عن الرموش الصناعيه 

الماسكارا دي فكرتها نفس الشي عباره عن ماسكرتين مع بعض الاولى بالزبط نفس ماسكارا لايتز كاميرا لاشز اللي اتكلمت عنها قبل شويا بس حجمها اصغر ، والماسكارا الثانيه عباره عن الياف او شعيرات صغيره تعمل زي اطاله او اكتنشن لرموشك وطريقتها سهله جدا : 

١- تحطي ماسكرا لايتز كاميرا لاشز ( الصغيره) .

٢- حطي عليها من ماسكرا الفايبر .

٣- حطي مره تانيه ماسكرا لايتز كاميرا لاشز. 

حبيتها بس حبيت لايتز كاميرا لاشز اكتر يمكن عشان مااحب الفايبر بس اللي يحبوا الفايبر حيحبوها 

سعرها اونلاين بدون شحن ٢٠ دولار يعني ٧٥ ريال تقريبا 

نتيجتها في الصوره الجيه :) 

 

جميع المنتجات تقدروا تطلبوها اون لاين 

او تلاقوها في متجري حاليا مو كلها بس بعضها متوفره بس حاوفر الباقي قريب ان شاءالله 

زوروا متجري  Shazishop  ;) 

هنا  

ان شاء الله يكون عجبكم الريفيو واشوفكم في ريفيوهات قريب 3> 3>

2 comments Make Up