بسم الله الرحمن الرحيم
كيفكم يا بنات ؟ وحشتوني ليا فتره طويله عنكم
اولا حابه ابارك للفائزه في مسابقة القيف اواي اللي عملتها الشهر اللي فات و حظ اوفر لمتابعاتي الجميلات اللي ماحالفهم الحظ و ان شاء الله تتكرر المسابقه في الايام المقبله .
اليوم حبيت اكلمكم عن تجربتي لمركز العنايه بالشعر والبشره .. كنت تقريبا من اكثر من شهرين قلتلكم ع الانستغرام اني زرت المركز فرع لابيلا (الفاتنه) بالمحمديه بجده.
وكنت منتظره اخلص جلسات العنايه بالشعر اللي بدأتها عندهم عشان اقدر احكم و اقولكم بالتفصيل التجربه دي كيف كانت وايش تفاصيلها وايش نتايجها وهل انا استفدت منها ولا لا.
بداية حابه اتكلم عن الجو العام للمركز؛ استقبالهم و تعاملهم معايا كعميله ؛ من اهم النقاط بالنسبالي دائما تعامل موظفات مراكز التجميل مع العميلات لأنها تعطي فكره مبدئيه عن شغل الصالون و تفانيهم بالعمل واتقانهم .
فحقيقي مركز العنايه بالشعر والبشره اول مادخلت حسيت براحه للمكان وللموظفات تعاملهم جدا جدا راقي بشوشين وبصراحه يدلعوا العميله ع الاخر . بالاضافه إلى نظافة المكان من جميع النواحي حتى الأدوات اللي يستخدموها لكل عميله تكون استخدام واحد معقمه ونظيفه وهذا الشي خلاني فعلا ارتاح و احب المكان. غير الموسيقى الهادئه اللي مشغلينها في كل مكان في المركز تحسسك بريلاكس وهدوء واسترخاء رائع.
طبعا المركز مختص بالعنايه بالشعر و البشره ؛ فعندهم قسم مخصص للشعر بخدمات كثيره جدا منها عنايه بالشعر ومنها علاجيه و عندهم اخصائيات للشعر والاستشاره مجانيه.
و قسم ثاني مخصص للبشره ايضا بجميع خدماتها من سبا و حمام مغربي بانواعه و جلسات عنايه للبشره و ايضا جلسات علاجيه ؛ وعندهم اخصائيات بشره و الاستشاره مجانيه.
غير الخدمات الثانيه زي مثلا بديكير و مناكير و قص شعر و مكياج وتساريح و غيرها من الخدمات.
راح احكيلكم ايش اللي خلاني اجرب زيارة المركز
انا شعري مصبوغ و ليا تقريبا ٤ سنوات متواصله وانا اصبغ شعري وللاسف عندي نسبة العنايه بالشعر صفر٪ يعني الشي الوحيد اللي اسويه اني اغسل شعري واحط بلسم وبس فتخيلوا ايش حيصير فيه غير طبعا السشوار و العوامل الأخرى؛ كل دا سبب لجفاف وتقصف وتساقط شعري فكنت الفتره الأخيره كارهه شعري بطريقه ماتتخيلوها وفي نفس الوقت ما ابغا اقصو خلاص ابغا اطول شعري بس ماراح يطول بالشكل اللي اتمناه طالما مافي اهتمام وعنايه وحتى لو طول حيكون جاف ومتعب.
قرأت اعلان على الانستغرام لمركز العنايه بالشعر والبشره كان اليوم الوطني ومسويين عروض على خدماتهم فكان من ضمن العروض عروض على جلسات عنايه بالشعر (عنايه و ليس علاج) لأنه في فرق بين العنايه والمعالجه طبعا ممكن نتكلم عنها في تدوينه ثانيه. المهم كان العرض على جلسات سعرها قبل العرض ٣٠٠ ريال ومع العرض ٨٥ ريال فقلت في نفسي ليه ماتجربي منتي خسرانه حاجه وسعر العرض مغري جدا
كان العرض كالتالي :
جلسة أنتي فريز للتخلص من النفشه والتجعد . قبل ٣٠٠ ريال وبعد ٨٥ ريال
جلسة فوليوم لاستعادة كثافة و حيوية و لمعان الشعر. قبل ٣٠٠ ريال وبعد ٨٥ ريال
جلسة اكسترا قلوس لشعر حيوي ولامع و صحي. قبل ٣٠٠ ريال وبعد ٨٥ ريال
اتصلت على المركز لأخذ موعد للاستشاره المجانيه لتحديد الجلسه المناسبه لشعري. وبالفعل رحت وقابلت الاخصائيه وكشفت على شعري وفروة شعري وعرفت انو طبيعة شعري دهني ولكن من الصبغات كانت الاطراف جافه ومتقصفه.
عرضت عليا اني اعمل جلسات علاجيه زي الكيراتين و البروتين بس حقيقة انا متخوفه من اني اغامر واعمل كيراتين لأن انا الحمدلله طبيعة شعري ناعم بس انعدم من الصبغات وخفت اعمل كيراتين ويتساقط شعري لأني سمعت من اكثر من وحده تقولي اتساقط شعرها بعد الكيراتين وفعلا انا قرأت وبحثت عن موضوع الكيراتين ولقيت انه اضراره اكثر من فوائده فقلت للاخصائيه انا حابه اعمل جلسات عنايه ما ابغا ابدأ على طول بجلسات علاجيه و انا في الاساس مش معتنيه بشعري فحابه ابدأ بجلسات عنايه لو حسيت اني ما استفدت ممكن اشوف جلسات علاجيه بس ماتكون كيراتين وفرد.
فقالتلي زي ماتحبي واختارتلي جلسة الأنتي فريز للتخلص من النفشه و التجعد وقالتلي لازم تعملي اكثر من جلسه يعني اقل حاجه تعملي ٦ جلسات عشان تحسي بنتيجه اما جلسه وحده ماراح تعملك حاجه. و نصحتني اني استخدم شامبوهات اورجانيك يعني خاليه من المواد الكيميائيه زي شامبوهات الارجان او المكاديميا وكان عندهم مجموعات عرضتها عليا نتكلم عنها بعد شويا. طيب بما اني احتاج اقل حاجه ٦ جلسات وانا دحين دفعت ٨٥ ريال للجلسه الأولى فسألت الاخصائيه هل ممكن ادفع لعدد من الجلسات اليوم طالما عليها عرض واجي اعملها في ايام ثانيه ؟ قالتلي طبعا ممكن واستغلي العرض احسن فدفعت ل ٤ جلسات اضافيه ونبهتني انو الفاتوره مدتها ٣ شهور من تاريخها. فصارت كدا ٥ جلسات.
بدأت الجلسه الأولى. ايش يعملوا في جلسات الأنتي فريز يا ترا ؟
جلسات الانتي فريز عباره عن جلسات عنايه زي ماقلتلكم قبل كدا يستخدموا فيها جهاز يسموه جهاز النانو وهوا تقريبا زي بخار الماء يفتح مسامات الشعر عشان يقدر يمتص الماسكات اللي يحطوها ليا عشان كدا اسمو نانو يعني جزيئات الماسك المتناهية الصغر يقدر الشعر يمتصها بعد فتح المسام.
وهادي صورة الجهاز
تبدأ تعرض شعري للبخار بجهاز النانو تقريبا لمدة ١٠ - ١٥ دقيقه . بعدها توديني ع المغسله عشان تغسلي شعري وتعملي مساج لمده ١٠ دقائق تقريبا. بعدين تحطلي ماسكات للشعر خاصه بالانتي فريز + سيروم وترجع تعرض شعري لجهاز النانو عشان يساعد الشعر في امتصاص الماده لمدة ١٥ دقيقه . وتعملي مساج لمدة ١٥ دقيقه
وترجع تغسل شعري مره تانيه . بعدين تعرض شعري لجهاز الترا ساوند عشان يثبت المواد المستخدمه للشعر.
بعد كدا تعرض شعري لجهاز الفريزينق عباره عن بروده شديده تعمل على اغلاق مسامات الشعر و بعدها ماتغسلي شعرك لمدة ٢٤ ساعه عشان شعرك يستفيد من الجلسه.
و بكدا تخلص جلسة الانتي فريز تقريبا في ٤٥ - ٥٥ دقيقه .. وعملت الجلسه دي زي ماقلتلكم ٥ مرات
طيب .. مستنيين اقولكم النتيجه صح ؟ طيب استنوا شويا لووووووول
قلتلكم انو الاخصائيه عرضت عليا مجموعه للشعر عشان استفيد اكتر من الجلسات في البدايه مااقتنعت بعدين لما فكرت بيني وبين نفسي قلت طيب بين كل جلسه وجلسه حتعمليها في المركز في البيت كيف حتعتني بشعرك ؟؟ وبيني وبينكم انا كسلانه جدا يعني عارفه نفسي لا حاقوم اخلط خلطات لشعري ولا هم يحزنون فقلت خليني اشوف المجموعات اللي عندهم وورتني كذا مجموعه ونصحتني اخد مجموعة المكاديميا.
المجموعه من شركه ايطاليه اسمها PHYTORELAX تبيع منتجات عنايه بالشعر والبشره و الجسم كلها مواد طبيعيه واورجانك خاليه من المواد الكيميائيه و اعتقد انو مالها وكيل هنا غير مركز العنايه بالشعر والبشره (مو متأكده من المعلومه دي بس اتأكد حاقولكم اذا صحيحه او لا).
المجموعه عباره عن : شامبو زيت المكاديميا لزيادة لمعان الشعر . عادي تغسلي فيه شعرك حبيت ريحتو و ينظف الشعر مزبوط ويعمل رغوه حلوه.
قناع (ماسك) زيت المكاديميا لزيادة لمعان الشعر. بعد ماتغسلي شعرك بالشامبو تحطي الماسك على شعرك وهو مبلل بالكامل وتخليه لمدة ١٥-٢٠ دقيقه. كمان ريحتو حلوه بعد ٢٠ دقيقه لما تغسليه حتحسي انو مافي تشابك في شعرك.
اخيرا سيروم زيت المكاديميا. لزيادة لمعان الشعر. تحطيه على شعرك مع عمل مساج لفروة راسك (على فكره حاولوا دايما تعملوا مساج لفروة الراس لأن المساج يحفز فروة وبصيلات الشعر على النمو) بعد ماتغسلي الماسك.
واتركي شعرك ينشف شويا وبعدين مشطيه بمشط فتحاتو كبيره افضل حتحسي انو شعرك يتمشط بسهوله ومافي تشابك.
المجموعه سعرها غالي شويا صراحه و دا اللي كان مخليني متردده لشرائها مني فاكره سعر كل منتج لحالو بس المجموعه كلها ب ٦٣٥ ريال . و ليا دحين شهرين استخدمها مرتين في الاسبوع و ماشاءالله العبوات لسه يمكن تكفيني كمان شهرين.
طيب نجي للنتيجه : بعد ماخلصت جلساتي كلها واستخدمت المجموعه ايش حسيت؟ حسيت الحمدلله شعري هجدت النفشه اللي كانت فيه بسبب الصبغات و رجع لمعان شعري الحمدلله بس التقصف مااتعالج طبعا. و انا كنت عارفه انو ماحيتعالج التقصف لأنو علاج تقصف الشعر الوحيد هو القص للاسف و التقصف كمان يسبب تساقط الشعر فماكان قدامي حل تاني غير اني اقص الاطراف المتقصفه. وفعلا بعد ماقصيتها الحمدلله رجعت حيوية شعري و خف التساقط ماوقف بس خف كثير الحمدلله واتحسن شعري عن اول حتى لما اغسلو حسيت بالفرق مافي تشابك وبعد الغسيل لما اسيبو ينشف شويا الحمدلله مافي نفشه و طبعا دا يرجع لطبيعة الشعر و انا قلتلكم من البدايه انو اساس شعري الحمدلله ناعم.
و بكدا خلصت تجربتي للعنايه بالشعر مع مركز العنايه بالشعر والبشره و ان شاء الله افكر اجرب خدمات ثانيه عندهم للشعر.
طيب .. ايش كمان جربت في مركز العنايه بالشعر والبشره ؟
اتصلت عليا مديرة المركز و قدمتلي دعوه لتجربة جلسة عنايه للبشره بالكافيار على يد اخصائيه فرنسيه. وبالفعل رحت لتجربة الجلسه. كلنا نعرف فوائد الكافيار للبشره.
ايش هوا الكافيار ؟ هوا عباره عن بيض يستخرج من السمك خصوصا السلمون ويعتبر من الأغذيه الفاخره.
ايش فوائده : يكسب البشره عناصر لمقاومة علامات تقدم السن. فالمواد المضاده للأكسده الموجوده في الكافيار تعمل على شد البشره وتقليل الترهلات و اخفاء الخطوط الدقيقه في الوجه.
يقلل من نسبة تغير لون البشره.
يساعد الأنسجه على الاحتفاظ بالماء.
يمنح البشره رطوبه ونعومه واشراقه.
كل المعلومات دي قالتها ليا الاخصائيه الفرنسيه ونصحتني اني اهتم ببشرتي لأن العنايه بالبشره هيا اللي تؤخر ظهور علامات تقدم السن. وقالتلي الحمدلله بشرتك حلوه وواضح عنايتك عليها (ماشاءالله تبارك الله).
عملتلي الجلسه وكانت جلسه رائعه جدا كلها دلع وكلها استرخاء ماكنت ابغاها تخلص مدتها تقريبا ساعه. استخدمتلي فيها كت كلو منتجات مستخلصه من الكافيار.
بعد ماخلصت الجلسه حسيت بنعومه في بشرتي و نقاء ونضاره .. طبعا لنتيجه افضل المفروض اكرر الجلسه دي من فتره لفتره و ان شاء الله لو لقيت فرصه راح اعملها تاني.
سعرها على ما افتكر ٧٥٠ ريال و احيانا يعملوا عليها عروض فتسير ب ٤٥٠ ريال.
دي كانت تجربتي كامله لمدة شهرين في مركز العنايه بالشعر والبشره فرع لابيلا (الفاتنه) بالمحمديه بجده.
راح احطلكم تلفونات المركز لو حابين تتواصلوا معاهم او لحجز مواعيدكم
الرقم الموحد 920000037
الرياض 0114193279
جده 0126633600
الخبر 0138670809
و حسابهم على الانستغرام عشان تشوفوا عروضهم اول بأول
يارب اكون قدرت افيدكم بالتدوينه دي و ان شاء الله اشوفكم في تدوينات جديده.
لاتبخلوا عليا بتعليقاتكم لأنها فعلا تسعدني 3>
بنشكر القائمين على الموقع فعلا وعلى المعلومات القيمة الي بتقدموها اقل شي نقدمه لكم هو كلمة شكرا على كل التعب ده في كل ما يخص طرق العنايه بالبشره يوميا
ReplyDeleteللبنات ويارب يسعد كل العرايس الي بتتجوز اليومين دول ويكون فرحهم حلو اوي ويتبعو المعلومات دي علشان يظهرو في فرحهم قمماير
ش
ReplyDeleteقبل البدء بالقيام بعملية طريقة زراعة الشعر في تركيا يجب الحرص علي عدة اشياء فيجب اختيار المركز الموثوق به فهو يعتبر افضل مركز زراعة شعر في تركيا كما انه يجب علي المريض قص الشعر بطول معين و هو 0.9مم و النوم جيدا ليكون المريض مرتاحا و تكون زراعة الشعر في اسطنبول بسيطة ف افضل مركز لزراعة الشعر في تركيا فيكون ماهو افضل مركز لزراعة الشعر في تركيا
ReplyDelete
ReplyDeleteشركة ترولى لمكافحة الحشرات بالرياض
شركة تنظيف شقق بالجبيل